المقهى اللي جيته في وقت كنت ماني عارف وين أروح مع أصحابي، محتارين وين نروح بعد ما خلصنا دورة حضرناها سوا، فتحنا قوقل ماب وبدينا نصطاد أماكن رايقة تستقبل سوالفنا ومزحنا وضحكنا …
وقع اختيارنا على مقهى لاتيشا … مقهى للقهوة المختصة وكان الصدق أكثر شي شدني له هو الآيسد كوكيز عندهم قلت لازم أجربه …
سمّينا بالله وتوجهنا له وأول ما دخلناه لقيناه مكان رايق وهادي وتقدر تختار جلستك داخلية أو خارجية
أول ما تدخل يستقبلك الباريستا بابتسامة شِرحة وياخذ طلباتك ولو محتار يساعدك تختار قهوتك وحلاك بكل سهولة.
توزعنا على كراسينا وكانت دقايق وبدأت طلباتنا بالوصول … القهوة كانت في الراس، آيس دريب مع توت لذيذة ونكهة التوت فيها ما هي طاغية وفي نفس الوقت تستطعمها مع كل رشفة.
بس بالنسبة لي كان نجم اليوم هو الآيسد كوكيز، قطعتين من الكوكيز الدافية محشية بآيسكريم فانيلا في مكس عجيب بين الحار والبارد، بين الطراوة والقرمشة.
أتذكر اني قطعته ٤ قطع عشان نتقاسمه انا والشباب لكن لعلّي أكلت الجزء الأكبر منه …
في خلاصة الكلام لاتيشا مقهى رائع لقضاء الأوقات والاستمتاع بالقهوة المختصة والحلويات المصنوعة عندهم، متعة ترافق سوالفكم، شغلكم، مذاكرتكم وكل لحظاتكم …
تلاقونه بالرياض في طريق أنس بن مالك
